Республикалық "Үздік авторлық бағдарлама" конкурсы

«Дарын» республикалық ғылыми-практикалық орталығы педагогикалық мамандықтың мәртебесін көтеру, дарынды балаларға арналған білім беру ұйымдары мұғалімдерінің инновациялық-педагогикалық қызметін, кәсіби шеберлігін дамытуға ықпал ету мақсатында 8-9 қараша күндері «Алатау» шипажайы базасында (Алматы қ.) дәстүрлі «Үздік авторлық бағдарлама» республикалық конкурсын өткізді.

Конкурстың негізгі мақсаты – білім беру ұйымдарының талантты, шығармашылықпен жұмыс істейтін педагогтарын анықтау және қолдау, мұғалімдердің зерттеу және авторлық бастамаларының дамуына ықпал ету, дарынды балаларға білім берудің мазмұнын жетілдірудегі инновациялық идеяларды жинақтау және тарату. Біздің мектептің 32 жыл еңбек өтілі бар жоғары санатты технология пәнінің мұғалімі Райымбекова Айхан қатысып, І орынды иеленді.

Қазылар алқасы ұстаздың авторлық жобасын бағалап, Қазақстан Республикасы Білім және ғылым министрлігінің І дәрежелі дипломымен және «Дарын» РҒПО-ның мақтау қағазымен марапаттады және естелік сыйлықтары табыс етілді.